قصيده في الشعر الشعبي
ضيعتي
رحلة فكر عا صوب هاك الدار
سفرة عمر يخت و حكايا حجار
ضيعة عتلة...البال محتلة
اكتر من بحوره ملاني اسرار
مشتاق شمشم شجرة الزيتون
وريحة حبق عبقة مع الطيون
والزعتر ل عشعش بذاكرتي
ريحة بلادي بشم وين ما كون
شو اشتقتلو للبيت لي تعمر
بعز وشبابيكو خشب أصلي
وشو اشتقت لا لرغيف لمحمر
ولبنة مع الزيتون والبصلي
وعالمصطبة ورده عليها حام
جوع العطر وكتير زعلانه
حتى العريشة لي تكت تتنام
شروشا بقلب الارض ندمانه
وشجرة السرو العز عنها غاب
واغصانها عالارض متكية
وليل الهوى لي يلعب بلعباب
وتضحك نجوم الليل حنية
.
عنا عريشة كتير حلياني
الشعر الحلو من خمرها تحلا
وما كان يخلق شعر لبناني
لوما العربشة من خلق الله
ولا يوم بالغربة كنت راضي
وجن الهوى ودرب التعب دربي
ولوما الطفر عا بسمتي قاضي
ما كنت بقضي العمر بالغربي
د عماد ترحيني
ليست هناك تعليقات:
إرسال تعليق