گيظ العمر ...
مؤيد خليل العطار/ العراق
يچويني .. و اهجس نار .. و اسكت ..
من أمدّ .. ايدي اعله ثلجك .. سكته …
و يتيه عمري .. بلا رسن ..
ما بين نارك .. و الثلج .. فرفحته …
و آنه اعله چم محمل .. حملتك ضيم يسبگ ضيم ..
و اتباهيت بيه .. و احملته …
و اعطش .. و اجيك .. ابكل ضماي ..
بثگل شوگي .. العفته …
و الگاك .. بس شلگاك .. من تبخل عليّ ..
گيظين ..گيظ .. إمروّتك .. يشرب شتاي ..
و گيظ سم اشربته …
و اغفه .. إعله گيظينك عطش ..
حدر الثلج ناگوطي .. يبست شفته …
و حيل المربعانيه .. چيلن يستحي .. چتفته …
چم دوب .. يا كانون حزني ..
بنار حزني .. اتزيد .. و اتحملته …
و چم دوب .. بسنون الصبر .. اتمرعد .. و طبع النفس ..
ما خذني حد امكابري .. لزرنيخ صبري .. اجرعته …
و چم دوب .. يا خيط الوصل ..
كلما اشدك .. تنگطع .. و ارجع و اشد .. و تنگطع ..
و اردود .. چم اردود .. چم و چم بعد .. و ليمته …
ظنيتك .. اتفز غيره .. عالماباع سر البعته ..
ثاريك .. عالشالته الغيره اعليك .. غيظك .. شلته …
مشكور .. يا گيظ العمر .. و اقبلها منك .. و احلف بكل الذي ..
ما صنته …
ما بدّل اطباعه الثلج .. ذاك الثلج ..
بس انت مو ذاك انت …
بس انت مو ذاك انت …
ليست هناك تعليقات:
إرسال تعليق